佛系買缽2018(1) - 緣份到，自然會…

2018.04.17 加德滿都

每一次選購西藏頌缽，都係一趟艱辛的旅程，有睇過我過往網綕分享的朋友都應略知一二，今次也不例外。

我以往是儲夠一定的訂單才到尼泊爾選購頌缽，但有見能買到優質手造古董頌缽的機會越來越小，價錢亦被可愛的同胞炒得越來越貴，所以在去年10月，雖然手上只得一、兩張訂單，已聯絡神龍老師落單訂購頌缽及gong，希望盡可能有機會時入多些貨，以免將來想要都無。係真㗎，我預期以後嘅學生或者只能買到新做嘅手造缽，質素同治療效果真係會相差很遠的。

神龍老師話有貨，叫我飛過去。鑑於過往的慘痛經驗，今次堅持要他拍照給我過目，並列明尺寸，證明真的有貨，我才飛過去。他應承了，說次天發相給我，就係咁，哈哈，擺擺尾，又玩失蹤。

直至12月我在東京旅行時，收到神龍老師的訊息，他說已找齊我所需要的貨物，叫我三日後到尼泊爾。我聽了後啼笑皆非，告訴他我身處東京，一星期後才回香港，最快要1月才可以到尼泊爾。就係咁，神龍老師又擺擺尾，直到今年三月尾才再出現，說四月頭有貨。

我早已安排好工作，不能臨時取消，遂問老師能否等到4月17日才起行，他說可以。我訂了機票，起飛前一星期再和他reconfirm見面的時間地點，誰知神龍老師停留在他的佛系異度空間，電話唔接，訊息唔覆，直至我上機果刻，都搵佢唔倒。

我嘅心情係點？哈哈，聰明嘅你應該會估到。我真係有考慮過取消行程，不過唔想浪費咗張機票，不如嬲嬲哋走去行山算數！在登機閘口前，聯絡我在加德滿都經營旅行社的朋友Chitra，請他為我安排。碰巧他在他那山卡啦的山區環保度假村內，邀請我去探訪他。

去他的Eco Lodge 路程崎嶇，要乘內陸機到 Pokara ，再轉乘一小時的士或巴士到小鎮Lumie，再行一小時山路才能到達。最大問題係我拖喼，點拖住個喼行山呀？佢叫我盡量將行李留在加德滿都，只攜帶必需品上山，並會安排挑夫幫我拎個喼。我告訴他我要考慮一下，到達加德滿都後才回覆他。就是這樣，我帶著蝦餃就蝦餃燒賣就燒賣的隨遇而安大無畏精神上機，展開我的佛系購買頌缽之旅。

航班降準時落加德滿都國際機場，我亦將我的模式，哈哈，轉為低效率、要大量耐性的Nepalese Style。我順利過關，在混亂的行李帶等了個多小時才拿到行李。 一出機場門口，慣性的人頭湧湧，不同的酒店及團體舉著人名牌來接機。我在人潮中找到一個＂近似＂我的名字，Serine Mace，yes，仲唔係我？便愉快地跟司機相認，順利抵達熟悉的Fuji Hotel。

梳洗安頓好已經是凌晨二時，我再留訊息給神龍老師，倦極倒頭大睡，有乜事瞓醒再算。