佛系買缽2018(2) - 柳暗花明

2018.04.18 清晨  加德滿都

早上五點半已經被窗外的晨光喚醒，想再睡，輾轉反側也不能眠，遂開手機檢查一下最新訊息。

勤力的Chitra一早已把飛往 Pokara的航班資料傳送了給我，看著看著，電話響起來，竟然是神龍老師打來給我！可以晨咁早五點幾打畀我，而又機緣巧合可以搵到我嘅，果然係神龍！

電話另一端傳來神龍老師精神奕奕的聲音：「你好嗎？ 你嚟咗加德滿都嗱？」… (下刪500字客套對話)

「我哋幾時可以見面？」我入正題。

「我呢排好忙，4月30號吖。」

「吓！我4月24號就要回程返香港喎！」

「我4月20號要飛曼谷做野，要4月30號先返。」

唔係掛，咁大整蠱？約咗我，自己卻飛去泰國，咁神奇！

「 咁我哋只得今日同埋聽日可以揀缽！你今日得唔得閒呀？」我一定要抓緊時間。

「好呀，我出嚟搵你食早餐喇。」

「不用了，我酒店包早餐的。」

 「咁我十點鐘左右來酒店接你？」

 「好呀，到時見。」

我真係一額汗，只得兩日揀缽，其實有些危危乎，但別無他法，唯有見步行步。哈哈，今次果然係佛系買缽，只要緣份到，神龍老師自然會出現，仲好好彩咁攝倒兩日時間！

定了時間，我的日程安排就易辦得多，隨即跟Chitra 相約，請他替我訂4月21日的航班，先擬在山上住三日兩夜，去到看看實際環境再計劃餘下日子的安排。

一切辦妥已是早上七時，洗個面，去餐廳食早餐，儲備好能量，迎接今日嘅大作戰！