尋寶•要趁有氣有力(8) - 博大霧

14.1.2017 1530hrs

畀完錢,我自携20kg,餘下付託空運。
老朋友Bachua 立即把我的頌缽搬到他的辦公室,
安排pack 箱空郵到香港。
他,比我老師有效率得多,
三兩下手勢便計好數,準備分3箱送港,
每個箱加packing額外重5kg。
嘩! 5 kg咁重,究竟佢點pack呀?

搞掂空運,就到我自己的手提及寄艙行李。
我到酒店取回行李箱,
在老師助手的協助下,
將頌缽及棒棒pack好,
結果寄艙行李是29 kg,沒超越限額,
但手提行李是15kg,
哈哈, 今次真係要扮鎮定,
過counter時要舉重若輕咁拎行李,
以逃過職員們的耳目。

一切安頓後,終於放下心頭大石,
時間亦已去到四點四十五分,
個肚終於都識得嘰哩咕嚕嗌肚餓,
係呀,仲未食午餐㗎。
我走到一間可以望住佛眼的越南餐廳,
享用那頓遲來的午膳。

坐下來,終於識得攰,
軟軟地趴在枱上,
連抬起手都覺得困難,
繃緊的神經亦開始放鬆。
理應可以預先安排好的事,
要堆埋一日之內密集地完成,
是對我體力及耐力的一大挑戰。

望著佛眼,望著熙來攘往的人潮,
呢幾日發生嘅事真係好似一場夢咁,
腦海中閃出這幾句歌詞:
明明我已奮力無間踏著面前路,
夢想中的彼岸為何還未到~~
我的彼岸在哪?
哈哈,同埋係咪可以hea下,
做野唔好咁搏呢?

醫完五臟廟,返回舖頭,
Bachua 原來在等我,想跟我告別,
那一刻真係好感動!
Bachua 問我幾時去機場,
我話遲啲截的士去。
哈哈,他跟住就發功,
逼我老師送我到機場。
在他的威逼下,
老師無奈首肯。
Bachua, 愛死你!


老師在送我到機場途中,
接連收到那兩位一齊去Pokhara遊玩的朋友的電話。
他們祝我一路順風,
叮囑我下次來尼泊爾一定要找他們,
跟他們遊玩,跟他們喝酒。
就是這既窩心又溫暖的人情味,
令人與人之間的關係更感可貴。

到了機場,
在港龍航空的check in counter 排隊,
眼見很多乘客都被要求將手提行李放到磅上磅重,
真係好驚鬼計會被識破。
到我辦理登機手續時,
個心卜卜卜卜咁跳,
但係又要扮鎮定。
職員問我有冇手提行李,
我用兩隻手指勾起那隻15kg的細喼,
輕描淡寫咁說只有這件,
他便把登機證及證件交給我,yes,成功!
我忍住笑,扮作若無其事咁乘電梯往離境大堂,
到咗離境大堂先放聲大笑,
我呢招大力金剛指真係駛得。

呢份成功搏到大霧嘅喜悅,
哈哈,我諗你哋難以想像,
所以面對港龍航空的慣性delay,
我也不太介懷。
香港,我來也。

留言

這個網誌中的熱門文章

學員分享:西藏頌缽療法初階-好有心、好有心、好有心嘅有心人

怎樣才能增強頌缽的力量

休假啟示:25.11 - 11.12.2019