唐卡的故事 (上集)

是次尼泊爾之旅的其中一項收穫,是買了三張漂亮的唐卡。 雖然不是佛教徒,但一直都對唐卡甚有興趣, 那精細的畫工,撇除宗教的角度,確是非常細緻的藝術品。 可惜一來不懂挑選,二來怕被劏到一頸血,所以一直都沒有購買。

在老師的引領下,終於在加德滿都的小商店內, 購買了三張由喇嘛親手繪畫的唐卡。 係呀,係喇嘛的真跡,而不是普通畫師的手筆, 因此這三張唐卡特別有價值! 尤其喜歡那張銀底珍珠色的唐卡, 清麗脫俗,一看便愛上了。

回港後,滿心歡喜的在網上搜尋裝裱唐卡的商店, 將我的唐卡帶到銅鑼灣一間『聲稱』擁有豐富裝裱唐卡經驗的商店, 我的惡夢,便由此而起。

我的要求很簡單,不要咭紙托底,不要裝飾, 只想配襯一個簡單的畫框將畫裱起,以突出唐卡的內容。 我將此要求清楚明確地告訴那裝裱公司的女負責人, 亦告訴她我雖不是佛教徒,但那唐卡盛載著老師對我的誠心祝福, 有著獨特的意義。

那女士興高采烈的告訴我他們之前替過不少客人裝裱唐卡, 在她公司網頁上展示的唐卡,只是部分作品, 而且個個顧客都很滿意,叫我放心交給她,一定可以滿足我的要求, 並說四天可以完工,完工後會通知我。

等了一星期還沒消息,致電一問,那女士雀躍的告訴我已經完成, 而且師傅替我作主,加了咭紙,整得好靚好靚。 『吓,我講明唔要咭紙襯托喎。』我的心不禁一沉。 『好靚o架。你過o黎睇下先啦,包你滿意,唔靚唔收你錢啦!』

去到舖頭,見到實物,完全不是我所要的。 我不作聲,沉著氣,細心檢查那完成品。 那自以為是的女士自顧自吹噓師傅幾好心機整得幾靚, 說我一定會好滿意好滿意。

檢查完,真係火都o黎埋! 三張唐卡邊位的部分內容均被襯托咭紙掩蓋了, 尤以那張代表宇宙的最可憐, 不但失去應有的空間感,被逼困在畫框中喘息, 角落處還不明所以的被加上了一張古怪的黑色紙!

當時我係點樣控制我的怒火,我真係唔多記得, 只係好冷靜咁將每張唐卡的問題告訴那女士。 『阿小姐,我解釋俾你聽,你張唐卡唔係直呎, 師傅托咭紙要拉直線,咁先整得靚。』

喂喂喂,問題係,我由始至終,無話過要托咭紙喎。

『阿小姐,我解釋俾你聽,阿師傅好快手咁跟佢意思整o左, 我都控制唔倒,不過而家出o黎效果都好靚呀。』

張咭紙掩蓋著畫的內容,將我的宇宙收監喎。

『阿小姐,我解釋俾你聽,師傅托咭紙要拉直線, 已經盡量拉到最邊o架喇,咁樣襯個框最靚o架喇。』

主角應該係幅畫,唔係個框喎, 無理由用幅畫去就個框,而且,唐卡唔係普通畫,係有特別意思喎。

『阿小姐,我解釋俾你聽,咁樣整仲靚, 畫既內容咪都係一樣,無影響o架。』

救命!咁似麥兜落單叫魚蛋粉既對話o既! 天呀!佢根本無理過我講咩,只係將自己o既諗法硬塞俾我! 況且,佢由始至終,佢都淨係『解釋』俾我聽, 沒有歉意,一句對唔住都無,根本唔覺得自己做錯, 反而覺得額外加了咭紙其實係益o左我。

『我呢幅係唐卡,每條線都有意思,打個比喻, 你蓋著的這朶蓮花,係我o既財運,即係斷我財路; 你蓋著的這朶蓮花仲衰,係我o既姻緣,即係要我嫁唔出, 如果係咁,你話得唔得吖?』

到了此時,佢終於靜下來,不作『解釋』, 終於明白到那嚴重性,亦終於明白到我有幾不滿。

『咁你想點吖?』

『我只係想跟返我原先的要求,同埋要畫既所有內容出返o黎。』

『咁呢批畫架唔用得o架喇,我幫你重新再做過喇。』

三天後,我再到那舖頭,看到的,是…… 究竟我的唐卡會變成點呢? 那製成品,又能否如我所願? 那可愛的女士,又有甚麼精彩表現呢? 哈哈,就此賣個關子,吊下你o地癮先。

  (待續)

留言

這個網誌中的熱門文章

怎樣才能增強頌缽的力量

(第五十二屆) 西藏頌缽療法工作坊(初階) - 已滿 🎈📣

佛系買缽2018(4)― 參觀頌缽製造工場