東方訪問· 幕後花絮


如果唔係因為某君,
哈哈,我都唔會接受傳媒訪問。

2月時,收到東方日報記者的邀請,
希望能夠訪問有關西藏頌缽療法的詳情。
換轉係以前,我一定會拒絕,
哈哈,拋頭露面,
絕對不是我杯茶。
我,只是喜歡躲在我的小天地,
自由自在地做自己喜歡的事。

但碰巧正鼓勵某君從山洞中走出,
面對大眾,投入呢個世界,
冇可能自己卻講一套做一套,
只好膽粗粗充當身教,
接受這項挑戰。
況且在西藏頌缽療法的領域上,
的確有些訊息想向外界傳達,
所以促成了這次訪問。

回覆記者時,
好認真咁問佢可唔可以淨係對手出鏡做示範,
唔想見樣,
甚至乎笑說可否戴猩猩頭笠,
哈哈,相信佢當時一定以為我係傻㗎!
溝通過後,只要唔出大特寫咁就可以了,
並相約在3月2日早上來我的工作室進行訪問。

我們先熱身,談談今次會訪問的問題。
最搞笑的是記者姐姐想認識我的頌缽及工具,
指著我其中一隻頌缽問:「佢叫乜嘢名?」
哈哈,十足十問緊人叫乜名咁,
忍唔住笑著答:「佢叫劉德華!」
搞到記者姐姐傻了眼。
隨後她指著我個銅鑼問:「呢個係乜嘢嚟㗎?」
我笑著答:「佢叫劉青雲!」
女記者即時露出不相信的疑惑表情。
我補多句:「佢真係叫劉青雲㗎!」
攝影師亦加入戰團,
即刻笑著問:「咁黃秋生喺邊呀?」
我笑答:「黃秋生未買呀!」
妙問妙答之下,正式開始拍攝。

拍攝時真係堅緊張,
腦袋一片空白,
唔知講乜嘢好。
夾住個咪,哈哈,
第一個反應竟然係講:盧海鵬試咪,試咪!
記者、攝影師及我自己都忍唔住笑。

拍攝過程尚算順利,
雖然食咗唔少螺絲,
記者及攝影師都話咁樣先自然,
不用兩小時已經搞掂,
等待訪問正式出街。

首先發放的是東網版本(3月14日)。
老實說, 那訪問片段迄今我只是看過兩次。
在螢光幕見到自己的樣子,
真是覺得很別扭,
怪怪的,唔… 總之就係怪啦 。
看到大家的留言,
什麼很溫柔呀很上鏡呀,
哈哈,真係得啖笑,
我真係想像唔到可以將呢啲詞語套用在我身上,
一定唔係真㗎,一定係掩眼法!
 
* 訪問詳情請按此

接著發放的是東方日報版(3月17日),
內容跟東網版有少許不同,
多了我的comments部份,
亦是我想發放的信息,
或許東網版是以錄影片段為主吧!

 * 詳情請按此

還以為事件已告一段落,
等大家丟淡唔再笑我,
誰不知在愚人節收到朋友的短訊,
說她在巴士上見到我的訪問片段,
哈哈,呢個真係意外驚喜 ,
從來冇收過通知訪問會在巴士上播放咁大鑊。
所以如果你喺車上面見到我個樣,
唔好驚,唔好亂,
慢慢吸氣,慢慢呼氣,
影像係會消散,惡夢係會過去㗎。

快樂的,是我這一招拋磚引玉成功了,
某君亦開始從山洞走出來,
回復應有嘅幹勁,
不枉我拋頭露面,咁大犧牲,嗚嗚…

在此亦都要多謝記者姐姐的安排,
及攝影師幫我影咗輯咁靚嘅相。
呢篇訪問幕後花絮亦已完結,
多謝收看,後會有期,拜拜!

留言

這個網誌中的熱門文章

學員分享:西藏頌缽療法初階-好有心、好有心、好有心嘅有心人

怎樣才能增強頌缽的力量

休假啟示:25.11 - 11.12.2019