弊傢伙‧網頁被抄點算好

如果有一日，發現你自己一手一腳製造既網頁， 畀一個自己認識既同行新手催眠治療師抄襲， 你會有咩野反應呀？ 咁不幸o既事，就係發生o係我身上。

都知道擺資料上網， 預了被人看，預了被人用， 但沒想過連風格、內容甚至顏色， 一句唔該都無就被抄埋，八成似， 對方仲要係你認識， 開業前以師妹身份問過你攞資料的。

啞忍算數？不會。 不知情者不知誰是誰非， 倒過來誤會係我抄佢網頁咪大件事？ 為了保障自己，還是公開此事為佳。 一來讓她知道我知悉佢抄我， 二來讓她知道佢已失掉誠信， 三來讓她知道我不會再傻兮兮被她利用。

寄了電郵向她表達我的發現， 也不帶太大期望， 哈哈，唔通抄你果個會話： 係呀，係我抄你呀，吹咩？

結果一如所料， 將所有責任推落設計師身上， 聲稱自己沒有看過，對事件一概不知， 連一聲對不起也欠奉。 換轉是你，你會相信嗎？

結果係點？她換湯不換藥， 將最相似的那頁客戶分享改了highlight的顏色， 改了部份標題， 又將服務那頁的chart刪走， 但整體 style 依然是一樣。

嬲？有呀，嬲到十日十夜瞓唔著， 哈哈，胡扯吧，只是無奈及失望。 當初本著助人之心，真心希望能協助她， 多個同行去幫人都好呀。 但由此事看到她的機心、計算及品德， 有被利用、出賣的感覺。 唔，又上了寶貴的一課了。

如果她有幸看到此blog的話， 只想奉勸一句， 一個好的催眠治療師要有專業操守， 而我，再也不想跟她扯上任何關係了，阿門！