尋寶•要趁有氣有力(7) - 一個人的咖啡

14.1.2017 12:00pm

有沒有想過，
一個小小的舉動足以改寫命運？
而這轉捩點，
就是一杯咖啡！

踏進老師的鋪頭，
見他一臉倦容，
無精打采，
正在打呵欠。
寒暄過後，
他告訴我已為我準備好頌缽，
但鋪頭只得他一人，走不開，
要等店員辨事回來才可以帶我到貨倉繼續揀缽。
眼見時間一分一秒咁過去，
老師仍懶懶閒咁，
我個心唔急就奇啦。
但亦知心急都無用，
唯有聽天由命，
告訴他我會在佛塔繞圈祈禱，
過一會才回舖頭，
然後誠心許願，
希望能夠完成任務。

快速繞了3圈，
回到鋪頭，
職員仍未回來，
老師仍在打呵欠，
時間好像沒有前進過一樣。
老師說他真的很攰，
真的很想喝一杯咖啡提神 ，
可惜外賣咖啡店在當天休息。
念及他這樣攰也是因昨天的超長車程，
況且我留在店內也只是等待，
便自動請纓替他買咖啡。

我倒睇少了在佛塔買咖啡的難度。
好不容易到了咖啡店，
店員告訴我只限堂食不作外賣。
我用三寸不爛之舌企圖說服她借咖啡杯給我，
並承諾會把杯完璧歸趙。
她，哈哈，竟然是一副睬我都傻的態度，
別過臉唔理我。

我當然冇咁易放棄 ，繼續求她，
最後驚動了店長，
出來問個究竟。
結果係點？
哈哈，就係捧著一杯熱騰騰的即磨咖啡，
一邊行一邊無助地倒瀉在碟上，
笨拙地避過佛塔熙來攘往的人群，
把咖啡安全送到老師面前。
我真係冇做外賣仔，
亦冇做順豐速遞員的天份。

老師見到我狼狽的模樣笑到傻咗，
叫我下次幫襯有外賣杯的咖啡店。
我心想，一次夠喇，係唔會有下次㗎！哼！

他嘆完咖啡，
我把杯還給咖啡店，
女職完仍然係好cool咁收番個杯，
唔知佢淨係對我咁cool，
定係對所有人都係咁，
定係對唔識講尼泊爾話嘅外國人係咁。

返回老師舖頭，
太好了，那男職員終於回來。
老師帶我到貨倉，
指出他新為我準備的一批頌缽，
我便埋頭苦幹繼續挑選。
哎，點解又係大部份都係G。
當我尚餘約十隻頌缽未試，
但仍然欠缺最重要的F時，
個心，已經打定輸數，
諗定點同班學生交代。

這時出現老師的身影，
他問我進度點，
我如實相告。
他離開一會，
轉眼間捧了幾隻F上來，
說是他的珍藏，
本來唔捨得賣畀我，
但現在忍痛割愛。
說罷，佢就飄走咗。
我試了他那幾隻F，
嘩，果然全是佳品，
沉厚有力，震動盪氣迴腸，
若非那杯即磨咖啡感動了他，
他也不會割愛相讓。
最後奇蹟地搵齊學生們託我買的頌缽，
不過我自己想買果啲就搵唔齊，唉~

揀完缽，就到最後環節：講價！
頌缽的價錢取決於購買的數量，
通常都是到最尾揀好頌缽才知道確實要畀幾多錢。
今次頌缽的漲價升幅比去年高，
超出我的預期，
我帶的美金不足，
迫不得已要簽信用卡結帳。
老師亦提醒我優質的古董缽越來越難尋，
或許要有心理準備，
以後我的學生要買新造頌缽也未定。

大家睇到呢度，
係咪終於明白一缽難求呢？
所以有時遇到有人質疑點解我賣啲頌缽咁貴，
其實每隻都有血有淚，
同埋最重要的，
是質量有保證，
要靠人脈及look埋人情牌，
先可以搵倒好貨色，
每隻更是我精心挑選，
哈哈，你話我自戀都係咁講，
坊間賣的頌缽那能相比？