不丹治療手記(四) – 宣傳易
大家匯報進度。 魯芬終於把printer修理好， 可以列印宣傳物及筆記， 亦安排了一位主管作統籌及協助， 有事可找她幫忙。
至於我，要寫4份稿， 一份是放在客房內的詳細節目介紹， 一份是客人入住時連門匙一并奉上的單張， 一份是放在餐枱上的table stand， 一份是放在接待處的海報。
由於時間緊迫，只能完成頭兩份， 已於前一晚電郵給魯芬及老闆審批。 老闆有回覆，畀了意見，亦畀了綠燈； 魯芬睇都無睇，話老闆批准了就得。 我便回房努力加相做設計，砌好樣本。
當我用她們的電腦開啟節目介紹的檔案時， 文字及圖片的位置均遷移得很厲害，要花時間糾正， 佢地兩個好唔耐煩咁企o係我後面等我做野。 嘩，兩對眼bear到實，幾大壓力呀！
攪掂，列印出o黎， 咦，點解係黑白o既？明明話係彩色列印噃。 『係呀，部機壞o左，尋日拎去修理， 印唔倒彩色，只可以印黑白。』 今早匯報時又唔講？等我唔好加咁多相落去嘛！ 唯有再執一執設計，將照片縮細。
攪掂，列印好，再列印埋單張畀魯芬過目。
『咩o黎o架？』
『客人check in時連鎖匙一同派發的， 才可以肯定佢地知道有此活動， 我們昨天講好o左o架。』
『無呀，昨日淨係話會有table stand， 應該已足夠，無需要做呢樣野。 快o的列印份table stand稿件出來啦！』 極危險，思覺像已失調，簡直係劉浩龍上身！ 昨日已同意，加上我今早才匯報完整好份稿， 佢，無可能唔知喎……
唉，跟她爭論也無謂，這裡是她主場嘛， 況且時間緊迫，應先解決燃眉之急， 快快趣趣砌埋table stand份稿。
整了一個table stand出來，以為她們可以照著做， 便繼續埋首寫其他稿件。 怎知她們貪快，沒用剪刀， 徒手把紙張撕開，唉，唔駛講你都知會係點啦…… 沒辦法，這裡是不丹，真的要降低我的要求……
最後，錯漏百出的宣傳物都製作完成， 希望住客看到後，會有興趣參與。 而節目，亦訂定為4月6日至22日。 不過咁既宣傳方法， 唉，都係果句，祝我好運啦！
留言
張貼留言