突然... 休假啟示 (4 - 30/7/2016)
今次的假期有點突然及倉卒，點解？哈哈，畀兩個版本你哋揀啦：
A. 東主經營不善，與其拍烏蠅閒著，不如放一陣子假，去思過崖痛定思過
B. 東主有事，急需拆解
究竟係Ａ餐定B餐定AB餐都係，嘻嘻，你哋自己判斷啦！
本工作室將於7月 4 日至30日休假，8月1 日再投入服務，不便之處，敬請原諒。
各位，8月見。
唐卡的故事 (中) 暨有獎競猜遊戲
三天後，我再到那舖頭， 看到的，是我那宇宙已被釋放， 不過，右上角之前被那張古怪的黑色紙蓋掩著的六個釘書釘洞洞， 那因師傅疏忽而造成的六道『傷痕』，亦同時被釋放了！ 我的臉，即時變成黑臉琶鷺。 『呢幅畫，點解會多o左六個洞，你整爛o左我幅畫喎！』 『阿小姐，我解釋俾你聽，阿師傅拉呎要釘洞的， 咁幅畫先會直身好睇，呢個位已經係拉到最盡喇。』 雖然佢隻隻字字都係講中文， 但係我真係聽唔明點解拉呎會整爛我幅畫。 我繼續跟她理論，但因唔想悶親大家， 所以將她的強詞奪理省埋。 『阿小姐，我已經好努力咁補救， 自問亦盡心咁幫你做，你都唔滿意， 我都無辦法，而家唔收你錢，你拎番o的畫走啦。』 你整爛我o的野，仲講到我好似雞蛋裡挑骨頭想攞著數咁？ 『我份人好公平，呢兩幅我都滿意， 淨係呢幅你整爛o左我個宇宙，我好唔開心， 我唔想好似佔你便宜咁。』 『阿小姐，咁我收你$500啦，呢幅宇宙我唔收錢。』 當我在考慮之際，亦都準備拎錢畀之際…… 『阿小姐，做人既野，係有因果o架。 做人要有慈悲心腸，我已經當善心咁唔收你錢， 就當做慈事啦。你呀，都唔可以咁執著， 幅畫多o左六個洞，都唔會影響畫既內容o架，係無分別o架。』 吓，咁講野都得既，整爛人既野，叫人唔好執著， 咁即係話，我o係你塊面加多六個洞， 都唔會影響你係一條廢柴既事實！ 我真係忍唔住笑，亦終於發覺到， 跟她再談，只會浪費我既精力。 結果，係喎，結果會係點呢？ 究竟我會點做？ 果個跟唔係佛教徒既我講慈悲既女士又會有咩反應呢？ 唐卡的故事有獎競猜遊戲 為增添趣味，首三名估中我反應及最後做法既朋友， 將會免費獲贈西藏頌缽療法一節。 參加者可將答案在本網誌或在Facebook群組內遞交， 截止日期為12月16日。 答案及得獎者將於12月18日在網誌內公佈。 哈哈，睇下有無人可以估中先，唷！
留言
張貼留言