佛系買缽2018(6)- 上得山多終遇苦

2018.04.20 Lumie

早上0645已經準備好出發到機場，乘搭0900到Pokhara的內陸機。

雖然Chitra話可以搵挑夫幫我托個喼上山，但總是怪怪的，於是只將隨身必需品努力塞入我個細背囊，其餘均寄存在酒店，行山時會方便好多。

早上的加德滿都交通暢順，不消十五分鐘已經到達機場。我到Bouddha Air 的櫃位辦理手續，才知悉前晚有一馬航客機在跑道發生意外，尚未清理妥當，跑道暫時關閉，我嘅心即時涼了半截。當職員話畀我知，我嘅booking 被取消了，要我到辦公室查詢嘅時候，我另外果半截心，即時涼埋…

職員見我傻下傻下，無晒反應，親自帶我入柜位後嘅辦公室，交畀一男職員，並簡述我嘅情況。好彩有佢替我引路，果間辦公室七國咁亂，堆滿票務有問題嘅焦急旅客。職員替我致電發票 agent，要他出張新的機票給我。我在柜枱前呆等15分鐘，畀N咁多人批踭後，終於辨理妥當，獲發一張新機票，再去柜枱辦登機手續。

我拎住張機票，滿心歡喜出到柜位，點知，柜位關了，貼了一張機場暫時關閉，暫停辦理手續，直至另行通告的告示，我唯有找個位置坐下，耐心等待。

緣分到，自然能夠上機，這一等，已是四個多小時後的事，差不多接近下午一時才起飛。我在機場呆等不要緊，到尼泊爾這麼多次已經習慣了無聊地燃燒歲月，只著急在Pokhara機場接我機的Chitra哥哥。見面時，真係忍唔住大笑，哈哈，佢阿媽真係好似倒模咁，個樣同Chitra生得一模一樣，包保唔會認錯！

哥哥告訴我最後一班入Lumie村的巴士已開出，只可乘的士。我們先到餐廳祭五臟廟，然後乘個多小時的士到Lumie。當的士在顛簸的山間登瞪燈凳地行駛時，我的身體開始有高山反應，弊，忘了問Chitra究竟治途有多高，太大意了… 我趕忙調適呼吸，不適的感覺才稍稍舒緩，好彩終能安全到達目的地。

我們先在士多稍稍歇息，然後才開始登山。山路尚算易行，先經過村莊，然後進入森林，才轉為較斜較多彎。行了約20分鐘，跟挑夫會合，一個約十五歲的小伙子，我把行李交給他，沒有負擔，行走時當堂輕鬆得多。

行了個半小時，終於到達目的地，Kalsee Eco Lodge。看見連綿壯麗的Annapurna山脈盡在眼前，雪山的頂部被雲霧掩蓋，若隱若現，仙氣十足，山長水遠嚟到都係值得嘅。

Chitra 為我準備了簡單的茶點，我捧著茶細心品嚐，一邊欣賞四週風光，真係好正好爽。冷不防右腳眼感覺痕癢，伸手搔搔，手指黏黏的，望一望，竟有一大pat血及一pat血肉模糊的唔知乜東東，再望望我的右腳眼，嘩，好多血呀！