我在美國教授催眠治療的點滴(一) -上課了

今次到美國任教，沒有上次到不丹時那麼緊張。上年到不丹前一個月已經坐立不安，怕自己manage唔倒或做得唔夠好。或許是經過魯芬的特訓，令我覺得無論我準備有多好，計劃有幾週詳，也會出現很多未知之素，還是冷靜沉著期待面對，化身成輕輕鬆鬆鄧梓峰才是上策。

                                     
況且，嘻嘻，三藩市是大城市，要逃亡也比在不丹時眼前只得一條河，後面是喜瑪拉雅山，然後乜都無，要走都唔知走去邊，同唔知點走的不毛之境容易！ (詳情請瀏覽我的不丹治療之旅2012)。

比預定時間早兩小時到學校等候。本來可以入課室旁聽，Cheryl 教的課，沒大興趣，還想讓自己沈澱一下，便坐在大堂一角靜靜地看書，直到夠鐘上課前上youtube看了草蜢的『華麗舞台』，令血脈沸騰一下，畀個energy boost 自己，high一下才進入課室。

不出所料，又有變更。校長Randal想我先上lecture，將mini-concert延遲到lunch後進行。當然唔好啦，飯前是較佳時機，而且可以一氣呵成嘛。經爭取後如我所想進行，大家延遲午飯，午飯後再作課後分享。傾好後便拿拿臨unpack我的頌缽開始set野。

當時真係倒瀉籮蟹咁！忙著跟朋友打招呼，忙著應付上前好奇八卦發問的學生，最麻煩係有一位學院的講師特意來上我的課，仲拎埋佢十幾年前在尼泊爾旅行時買的三個頌缽話要畀我鑑賞，仲夾硬話要借畀我用，呀，救命！

我拎起佢果幾隻頌缽真係得啖笑，唔……，聰明的你都應該知道質素會係點啦！見佢興致勃勃，雙目充滿熱誠的樣子，也不好意思掃他興，只係話佢o的頌缽聲音好聽，但我已經夾好一套頌缽，不用外援了。他堅持把頌缽放在我旁邊，叫我有需要時用，直到他看到我把那大大小小共14隻頌缽set好哂的陣容時，才跟我說看樣子也不用他幫忙了，乖乖退回座位。

換好衫，開始上課，只係講o左三句開場白，學生們已不停舉手發問，仲問埋o的好鬼難答，唔係三言兩語可以答倒o既問題。我心想，唉，咁樣攪法好難捱喎，用中文答，容易啦，但用英文答，始終有言語障礙，未能完全表達到我想講的意思。

結果，佢o地問o左好多問題，畀o左好多個人意見，我答o左好多野，但如果你問我我講過咩，哈哈，真係唔記得，部分係吹水，係呀，仲有心情跟他們開玩笑，大部分是知識的分享，好自然咁不經思考就答o左。

我比較著重實踐及體驗，喜歡讓多些人能參與示範。第一個示範是用單隻頌缽來紓緩頭痛及集中精神，舉手做白老鼠的只得四、五隻。當佢o地看完第一個demo後開始起哄，到第二個加水示範頌缽的聲音及振動時更企哂起身走埋出o黎睇，哈哈，仲係要「食蕉」拉先肯返埋位果種。之後再做三個demo，分別是針對頭、心及全身的治療，簡直群情洶湧，要Randal協助挑選及維持秩序，我站在一旁set野，見到佢地成班大細路雀躍地爭野玩咁，真係好攪笑！

好了，第一位同學，來自上海的朋友，挑選了全身能量流通的治療。治療完結後，她坐在椅子上一動也不動，懶理同學們的催促(係呀，同學們以為佢暈o左，勁攪笑)，肆意地享受頌缽的聲音及振動在體內暢順地遊走的餘韻。這情況我見得多了，由得她繼續享受，開始跟第二位同學做心輪的治療。

第二位同學原本有些緊張，但當治療去到中段時，臉上展露出甜美的笑容。後來她跟我們分享，她的心打開了，漂亮閃耀的白光由心內如星光般發放，身心靈都得到整合和淨化。她不停的向我道謝，感激我帶給她的體驗及難以言喻的內在治療。哈哈，之後每逢有break時，她都過來跟我道謝，直頭當我係恩人咁，攪到我幾唔好意思呀。

到頭部治療示範開始，第一位同學嘆夠了，施施然起身，伸個懶腰，講述她的感受。她覺得振動、能量及氣流在她體內遊走，還看到佛祖的image，感覺平和寧靜，同學們都覺得好amazing。

第三位同學的反應較平和，沒先前兩位同學反應咁大，含著笑和諧地享受頌缽美妙的聲音。

完成了頌缽示範，讓他們了解到頌缽的運作及效用後，就到今次的主菜，小妹的自家創作：Hypno-Singing Bowl Therapy，頌缽催眠療法。